So 04.05.25 Ski- und Snowboardtour Gwächtenhorn (3420m)

Tourenziel: Ski- und Snowboardtour Gwächtenhorn (3420m)

Anmeldung: Bis Fr 02.05.25 bei Beni Hug oder via Kommentarfunktion

Teilnehmer:

- Beni (chef du tour)

- Suleika

- Iris

- Rene

- Theiss

- Küse

End of Season Skitour:

Beni Hug kündigt d Nachholtour a u es sy es de Küsu Wittwer, Theiss, Suleika, René u d Iris am Start. Am Vorabe hett d Suleika ä wunderbare Grillabe für SC Homberg Tüüreler organisiert u mir hei i ihrem schöne Garte dörfe schlemme u d Tuur scho vorbespreche. Merci fürd Iladig a alli liebi Suleika, de Uftakt fürd Abschlussskitour isch scho mau top gsi.

3h15 de Wecker lüütet u vermittlet scho mau Vorfreud uf de Tag, oder so… .
De ufem Steigletscher acho tagets scho langsam u mir mached üs ufe Wäg dure pänggelhärti Schnee. E paar Spitzkeehrene u mer merked, dass d Harschiise ihre Dienscht müesse atrette. Itze geits scho ume besser u es paar Schweissperle später heimmer die schwierigi Stell scho hinter üs. Prächtigs Wätter, die erschte Sunnestrahle uf de Gipfle, e liechte Wind u Schritt für Schritt de Bärg duruuf. Beni, Küsu u Theiss göi när rächts übere Westgrat richtig Gipfu, d Ski ufbinde u d Gogerituur cha loosgah. René, Suleika u Iris nähmäs gmüethlich u mached z erscht mal e Pause nachdem d’Westgrat Trupple loosgange isch. Mir treffed üs wieder ufem Gipfel vom 3420 m ü.M. Gwächtehorn, uf de Grenze vo Bärn u Uri. Schnaps hetts kenne gäh, derfür es schöns Gipfufoti u 1450 Höhemeter i de Scheiche. Mir gniessed für es paar Momente die pittoreske Alpe u schnaued d Ski wieder a fürd Abfahrt. Schwäre Schnee u trotzdem es paar schöni Schwüng später simmer scho wieder dunde. Chli süüreled d Oberschänkel auso scho. Theiss hett vordenkt u z Panasch chaut gstellt wo mer alli dankend agstosse hend, inklusive Nachos! Dutzdendi balzendi Frösch ufem Parkplatz sorged für Lacher. E feine Zmittag gits ir Gadmer Lodge mit «Chöööche». So stelled sich d Müettis Iris und Suleika e richtige Muettertag vor :-D. Danke fürs Organisiere vo dere schöne Abschluss-Skitour Beni, hett gfägt! Itz dörfed dSki i die wohlverdienti Summerpause.

Iris